賓架W請幾位傳媒界校友到銀行家會吃午飯，談及不少中環掌故，我地聽得津津有味，不過賓架W係話明校友聚會，言不及義，offtherecord不得引用及公開，否則以後唔再講嘢，大家識do嘞，在此略過不提。
返到公司，賓架W電話到：「傳真一個笑話畀你，啱啱收到嘅。」傳真收到，急忙細閱，咦，唔係笑話噃，不過諗落又係一個大大笑話，原來有一個XY機構寫信畀賓架W，恭喜佢已經得到一間「美國大學」頒授博士學位及其他榮譽獎，邀請佢參加頒獎典禮，並自願捐出八萬美元做為大學教育基金及頒獎禮費用。左丁山忍住笑，打電話回覆賓架W，「恭喜晒，你係傑出人物，抵你得到咁大個榮銜，畀八萬美元，抵喎。」賓架W話：「不如由你簽名捐錢，你都會有博士學位。」
飯後有笑料，幫助消化，可說有益身心。想起嚟，博士學位係唔係咁有吸引力呢？好多年前，左丁山想話攻讀博士，有美加大學取錄，但先父講明：「供你讀完大學，已算光宗耀祖，你再要出洋留學嘅話，唔該你自己搵銀去讀，屋企冇錢！」老竇講得有道理，於是放棄出洋，死咗攻讀博士條心，後來在商界學界見到唔少博士，叻嘅確係學富五車，令人嘆服，但見到一啲普通嘅博士，咦，醒在邊度呀，睇唔出，全無比較優勢，仲要俾人在背後取笑。一啲人勉強攞到一個博士學位，究竟對佢嘅事業有何幫助呢？社會地位是否因此而提高？相信答案是未必肯定。
個人能取得終身成就，得知名大學頒授榮譽博士學位，咁又唔同，係大學對該人士嘅社會貢獻有所認同，係真真正正一種難得嘅榮譽，好多人想恨都恨唔到。呢，仲係有好多人對博士有迷思，是但捐少少錢攞一個都制，為識者笑亦在所不惜。古人有捐官之事，今人有捐博士之實，太陽之下邊度有新事吖！個幾月前，真材實料嘅哈佛博士L請吃晚飯，到日本人會所食魚生，博士L當年就係攞到獎學金去美國嘅，故此十分認同美國博士生制度，佢話美國名校博士嘅質素有最低保證，極力主張後輩如要攻讀博士嘅話，到美國更好。佢攞美國人獎學金，又不留在美國貢獻美國人，是否美國為他人作嫁衣嫦呢？當然唔係，家博士L咪經常為美國學術制度講好話！