呢個月15號披嫁衣嘅徐淑敏（Suki）噚日同陸詩韻到圓方為眼鏡店宣傳，有4個月身孕嘅Suki着上鬆身裙同高踭鞋，仲讚未來老公黃浩（Kenny）戴太陽眼鏡好型仔，陸詩韻就着露背兼開胸裙示人，搶盡鏡頭。
體諒老公開銷大
Suki自從有咗之後都叠埋心水做少奶奶，佢一早同無綫請咗一年產假，早前仲話做埋上月22號喺尖沙嘴嘅活動就停工等嫁等生仔，不過噚日又忽然出嚟接job，佢解釋話成日喺屋企好悶，而且佢好識為老公荷包着想，Suki話：「仲未搵到奶粉同尿片贊助，有錢賺就賺，而且老公為婚禮都用咗好多錢，成7位數字，家都未緊張個婚禮，當出個function，反而家人就好大壓力。」
Suki透露之前照BB嘅性別，不過因為BB太百厭，所以照唔得清楚，但係醫生就話7成係囡囡，所以佢同老公都好開心，名就仲未改，相信中文名會交畀大師負責，英文名就由佢哋自己包辦。
陸詩韻帶眼識人
另外，陸詩韻話見到身邊朋友結婚生仔都好有衝動，由於之前佢同富商朱明傳緋聞，但最後有指男方係空心老倌，問陸詩韻搵新對象會唔會了解背景時，佢話：「會了解清楚，呢啲要好小心，都會堅持搵比較年長嘅異性，因為要照顧我唔易，自己又唔想好似湊細路，希望有多啲經歷，會識takecare我，等我唔使顧慮太多，可以做小鳥依人。」
