上海當局唔想失禮人，特別發出《市民指南》，呼籲市民明年世博期間唔好着睡衣出街，要「做個世博文明人」，籍貫上海嘅公民黨余若薇對呢個指南感興趣，因為據佢所知，半世紀前着睡衣出街係上海有錢人身份象徵，所以家陣仍然有唔少上海人鍾意着住睡衣外出買早餐、散步、去街市或者超市購物，甚至喺旺過旺角嘅南京路行人專區亦隨處可見。
着得出街見人嘅睡衣當然有番咁上下，絲質、繡花睡衣好常見，襯對皮拖鞋都幾有型。
余大狀話喺公眾場所着睡衣未必不合現代禮儀，也不見得有辱國體，政府要管人民衣着，似有干預公民自由之嫌，佢更話如果佢喺上海出生、成長，話唔定都係睡衣上街族。