港股跌勢未止，恒指昨日再大跌380點，跌勢比預期為急，大市會再下試日前21134低位和50日線（21153）支持。不過，昨日上升正股仍有370多隻，且升幅超過10%嘅都有26隻，市場氣氛仍不算太差。
有人炒，就有人跟住埋位，特別係大落後同大偏低股，唔少都趁機從後趕上。香港中旅（308）一有買盤到，就大幅飆升，搶上1.76元收市，大升10%，成交好「墟冚」，有1.84億股，幾年未見過咁嘅場面。
至於另一隻落後又偏低的傳統紅籌股深圳國際（152），在大跌市亦有強勢表現，高收0.58元，升1仙，連續兩日成交過億股，動力開始凝聚，一升破0.6元前高位阻力，升勢即會轉急。
由去年7月開始，深國一個大圓底形態，連埋最近5個月的「右柄」整固，大戶已收集咗年幾，現時股價已重上3條平均線之上，而MACD雙牛之勢又再轉強，一破位而上，中期上升目標指向1.0元水平。
深國主要業務是經營高速公路和物流園，資產豐厚，單係持有深高速A股及H股（548），以及南玻集團A股兩家公司嘅股權，已超過本身嘅市值。深國其他資產仲有兩條高速公路，同6個物流園及碼頭，佔地超過110萬平方米，資產值又係以10億元計。
資產豐厚遠超市值
深國持有深高速10.66億A股，昨收5.69元人民幣，及2457萬H股，昨收3.71元，（A+H）總值達70億元；另深國持有南玻A1.077億股，昨收17.51元人民幣，總值21.3億元。兩家公司持股合計總值已達91億元，遠超出深國市值81億元。
今年6月底，深國借貸淨額約100億元，但8成屬深高速所有，深國若將南玻A全數出售，本身已可變為無債公司，活動能力會大增。
09年（12月結）上半年深國賺5.03億元，估計全年盈利11億元，每股盈利7.8仙，以目標價1.0元計，PE亦未到13倍，仍在合理水平。
郭兆誠