投資推廣署前署長「米老鼠」盧維思（MikeRowse）出書爆「維港巨星匯」內幕，佢同孤獨推銷員係好兄弟，賣藥功力有番咁上下，夾啱時間營造出「禁書」疑雲，被政府打壓做到似層層，本書頓時矜貴咗。
米老鼠噚日去香港外國記者會推介新書順便演講，好多老友要求佢在大作上簽名留念，點知米老鼠話之前同政府打官司花咗好多律師費，家陣要賣書搵錢，所以簽名要收潤筆，簽一個名120蚊，即係本書售價。其實米老鼠講笑啫，因為在現場佢送本書畀朋友，冇收錢，況且佢出書都係為啖氣，唔係求財。至於本書好唔好睇，可以咁講，多謝米老鼠送書，八方可以慳番120蚊。