好好瞓嘅煲呔噚日殺入萬宜水庫攞彩，宣佈國家級香港地質公園成功申報。講到邀功，民建聯叻過煲呔，上禮拜已經拖行馬拉晒banner入萬宜水庫宣佈「成功爭取」。成件事最大功勞應該係漁護署仝人，民建聯夾硬先拔頭籌實在不該。
上任冇耐嘅漁護署署長黃志光左右做人難，惟有咁樣講：「呢件事，政黨都出過力，唔好話邊個多啲功勞，邊個少啲。」署長噚日提醒市民唔好掘走或者執走地質公園石頭留念，否則觸犯《郊野公園及特別地區規例》，任何人「挖出、開墾或擾亂土壤」，可處罰款2,000蚊及監禁3個月。八方記得民建聯成員曾公然執走地質公園石頭請專家鑑證，八方奉勸佢哋自首，唔好勞動署長出手好喎。