星期一早上收到《蘋果》轉來一封電郵，讀者Susana來郵話：「請代問候梁玳寧小姐，祝早日康復！」
唉吔，太遲咯，星期一早上已知道梁玳寧於星期日（十一月一日）晚上七時許魂歸天國，睇到Susana電郵，鼻為之酸。據公關大姐大講，十月廿八日星期三晚上，本來約咗玳寧出席一個飯局，但玳寧公司職員當日早上通知，佢唔舒服，不能出席，後來知道玳寧已入了東區醫院，陷入昏迷狀態，就此不醒，與世長辭。記得玳寧生前不時開玩笑咁講：「希望走得冇痛苦！」一語成讖，佢因為腦部突然中風，跌倒昏迷，實在不知道死亡的痛苦。
十月十八日出席披圖梁嫁女宴會，左丁山與梁玳寧同坐一枱，大家有講有笑，見佢面色紅潤，精神十分好，仲諗住年尾之時，問吓佢庚寅年甚麼生肖犯太歲之事，預訂一啲太歲牌，點知十三日之後，大家竟會陰陽相隔，人生無常，豈有如此令人心痛者！佢每年為朋友訂製太歲牌，唔收錢，只叫朋友憑心意捐錢做善事，左丁山每年照做，覺得流年順遂，以後冇咗玳寧，無人指點矣。
玳寧做唔少公關工作，其中一件最令左丁山佩服嘅，就係「獅球教育基金會」贊助之最佳進步獎。全港每年有不少會考尖子、高考狀元，得報紙錦上添花，爭相訪問。呢個進步獎因為冇尖子，傳媒冷淡對待之，比較少人提及。呢個獎係頒畀一啲成績未必好，但每年考試有大進步之學生，譬如左丁山記得有一年，一個女生出自問題家庭，曾自暴自棄，讀書成績差到不得了，成為問題少年，但後來得到正確學校輔導，讀書成效竟然大躍進，因而得獎。香港啲尖子之成為尖子，各有因由，唯獨是得到進步獎嘅學生，要克服好大嘅家庭障礙、心理障礙及得到切中要害嘅輔導先至可以激發上進心，讀書方有飛躍進步。呢個「獅球教育基金會」最佳進步獎得玳寧多年來大力推廣，逐漸為本港人士所知，希望呢個獎以後能繼續下去，玳寧亦會在天微笑也。