今年台慶頒獎禮中飛躍進步男、女藝員獎方面，敖嘉年和陳茵媺齊齊有份入圍，據悉二人會順利奪獎。其中敖嘉年憑《巾幗梟雄》中蔣必文角色而奸出位，表現有目共睹，雖然敖嘉年也有份憑《巾》劇角逐最佳男配角，但跟穩操勝券的Laughing哥謝天華拗手瓜，似乎是遙不可及的事情。
「陪前輩跑好開心」
記者昨日致電敖嘉年，對於有份角逐男配角及飛躍男藝員，他笑說：「嘻嘻，我都唔知有邊啲對手，不過男配角俾我揀，我都會揀Laughing哥，兩個獎嚟講，我對飛躍男藝員信心大啲。我印象中未試過有份喺台慶頒獎禮提名，最初以為今年淨係得飛躍提名，後來聽到有份提名埋男配角，有機會陪啲前輩好似Laughing哥咁一齊跑，我已經好開心o架啦。我覺得今年台慶特別好玩，除咗《巾幗梟雄》之外，仲有《宮心計》同《富貴門》，但當然我希望《巾幗梟雄》攞多幾個大獎啦。」
至於陳茵媺則分別在《學警狙擊》、《烈火雄心3》和《畢打自己人》演女警，為此她更剪掉留了多年的秀髮，她昨日在電話中說：「我聽聞有份提名飛躍進步女藝員同女配角，真係好意外、好開心，好多謝監製畀咁多機會我，有得提名已經好開心好興奮。」
演藝大獎歸余慕蓮
另外，向藝員前輩致敬的萬千光輝演藝大獎，據悉今年屬意余慕蓮（余毛），71歲的余毛在無綫服務數十年，擅演垃圾婆及醜女角色，去年她為《向世界出發》到貴州探訪，披露她從20多萬長期服務金中捐出8萬在貴州興建學校，善心受到各界一致欣賞。
採訪：林妃