古巨基加盟英皇後推出首張大碟，噚日喺尖沙嘴舉行咗個大型記者會，首播佢執導嘅MV，咁隆重其事，點知基仔由頭到尾戴住副黑超，佢一上台就話：「我早幾日撞玻璃，撞腫咗隻眼，所以我呢隻碟一定中硬。」一貫佢玩爛gag嘅作風。講到做MV導演，基仔話：「下個目標想真係拍套電影，題材想拍愛情片，因為我嘅愛情就係拍愛情片嘅經歷。」
自認專一
基仔之後做訪問時，就解釋點解會撞到隻左眼，都係因為貪玩之過，佢話：「之前萬聖節扮熊，咪返父母屋企搵衫囉，點知唔記得喺木門之後仲有道玻璃門，成個頭撞埋玻璃度，家隻眼瘀晒，都係一個寓意嚟嘅，咁隻碟應該會中硬。」基仔話今次做碟多咗份投入感，仲自己做埋監製，話晒都係過檔後頭炮，點都緊張啲。
講到話基仔喺台上一講愛情兩個字就好緊張，佢近年傳來傳去都只係得一個女朋友，就係佢助手Lorraine，記者笑佢應該係從一而終，冇乜愛情經歷？基仔講笑咁話：「二十幾歲人梗係有愛情經歷o架啦，3、5、7次都有嘅。」但係近年都係得一個之嘛，佢即口窒窒扯開話題：「做導演都幾好，我拍愛情片經驗多啲。」再追問佢係咪專一嘅人？佢就話：「我都係幾專一嘅。」
