今屆F1曲終人散，但好似我求大俠呢啲鍾意睇靚女兼睇八卦新聞嘅讀者，就梗係想知新鮮出爐世界冠軍畢頓，幾時同佢嘅日本名模女友道端謝茜嘉拉埋天窗啦！雖然畢頓採取拖字訣，早前話要成功衞冕世界冠軍先向道端求婚，但道端就一於少理，仲話深信畢頓會喺11月向自己求婚。計我求大俠話，家男女平等，道端大可以好似《求婚的惡魔》嘅主角珊迪娜布洛咁反客為主，主動向畢頓求婚o架嘛！
雖然畢頓同道端由相識到撻着同拍拖，不過係一年多啲嘅事，不過，由於兩人拍拖拍得夠高調，不時卿卿我我，而喺畢頓於巴西站提早奪得世界冠軍時仲發表愛的宣言，話個世界冠軍係屬於道端嘅，外界又點會唔問佢哋幾時結婚呢？
畢頓記招耍太極
連紅牛車隊嘅維特爾，喺日前阿布扎比站食尾糊，於賽後記者會都玩埋畢頓一份，喺記者面前問畢頓：「據聞你就結婚喎，幾時先？」但估唔到畢頓揸車快，轉數一樣快，佢回答話：「吓？乜你想向我求婚咩？」然後佢再嚟一招四両撥千斤：「最近有好多關於我戀情嘅正面報道，真係多謝大家關心，其實每一次拍拖，我都係諗住會開花結果嘅。」
喺嗰邊廂29歲嘅畢頓大耍太極，呢邊廂道端就明刀明槍得多，呢名25歲嘅靚女話：「畢頓同我講過佢想結婚，仲同我講我就係佢要搵嘅人。喺佢贏咗世界冠軍之後，於11月我哋會好好慶祝，然後佢就會跪喺地上向我求婚！」咦？家咪11月囉？咁畢頓同道端咪好事近？
不過，唔知係咪英國博彩公司相信「情場得意，職場失意」呢句說話呢？喺佢哋開出下屆世界冠軍賠率中，畢頓竟然有10倍，係第6熱門，反而同佢一樣係英國車手嘅「黑帝」咸姆頓，就被列為3.75倍嘅大熱。