本港上市公司每年都出年報，好似讀書時派成績一樣，過去一年功過盡現人前，除咗上市公司，監管機構好似金管局、證監會等都會出版年報。雖然唔知究竟一本年報有幾多讀者，不過為咗表揚各界人士精心設計嘅年報，香港管理專業協會每年都會舉辦最佳年報頒獎禮。
芸芸公司中，中電（002）奪得最佳年報獎；至於非牟利及慈善機構類別，就由證監、金管局、積金局三間監管機構分別奪得金、銀、銅獎。至於一般組別，由港交所（388）「以牛取勝」，奪得金獎，銀獎則一炮雙響，由滙控（005）同港鐵（066）瓜分，銅獎得主就包括機管局、恒隆地產（101）、載通（062）。華華睇完全部得獎年報封面，果然係中電年報最有設計特色（圖），又迎合服務主題，難怪奪得大獎啦！