由金銀業貿易場理事長李德麟（William）打骰嘅大唐證券，最近惹上官非，被證監會譴責之餘，亦要判罰300萬港紙。佢自己同該行高層兼得力助手鍾詠嫻（Wendy），亦被分別釘牌一年同年半。
大唐客買賣窩輪有回佣
禍不單行，皆因證監調查發現，喺04年1月至05年1月間，大唐兩名客戶買賣麥格理發行嘅窩輪時，大唐證券實際只收取低至0.04%嘅經紀佣金，而唔係一般嘅0.25%，而麥格理又提供高達交易金額0.25%嘅佣金回贈，咁即係只要肯做買賣就賺硬差價，令到嗰兩名客戶可以用相同價格，喺幾乎同一時間透過大唐買賣相同嘅窩輪，而毋須承受任何風險就可以賺錢。問題係，咁樣做係違規嘅，皆因推高咗相關窩輪嘅成交額，造成交投活躍嘅假象。
證監會批評，大唐證券當時對兩名客戶嘅違規買賣並無採取行動或加以防範，有損市場廉潔穩健，而李鍾兩人並無適當積極咁參與大唐業務，因此作出今次懲處。
咁啱得咁蹺，同大唐證券同系嘅大唐投資（1160），雖然都係由李德麟做大股東，又拍住鍾詠嫻做執行董事，但兩人今年6月1日齊齊宣佈辭職，當時並無解釋原因，呢個謎團今日唔知算唔算揭盅呢？
李華華
mailto:[email protected]