見到報紙報道有北區報販上街抗議私煙猖獗，不明所以。報販賣報紙嘅啫，私煙關佢地乜事？行經報攤，特登駐足而觀之，係有幾格賣煙嘅噃，於是傾番幾句，得知賣煙每包三十九元，報販得兩個幾，賣報紙每張六元，報販得兩元，唓，比例上賣報紙好過啦，好賺好多啫，點知報販話：「數唔係咁計，報紙銷量日降，免費報紙通街都係，我地驚o架，反而賣煙就幾穩定，點都可以幫補吓。」
咁為乜事上街呢？到賽馬車會吃飯，見到零售Ｌ，問佢知唔知。零售Ｌ話：「略知一二嘅，據我所知，家機場，過境嘅免稅店生意非常好──好在煙酒銷量大增，免稅店笑逐顏開。」咁多人到免稅店買煙做乜，零售Ｌ話：「呢啲嘢無謂畫公仔畫出腸，我唔想講得咁多。」如此神秘，益發引起好奇心，於是食飯後打電話畀一位日日來往香港羅湖，住在深圳之香港居民Ｍ，居民Ｍ離婚後，遷居深圳，好快就搵到一位四川靚女，結埋婚，從此朝朝自深圳回港返工，晚上過境返屋企，自得其樂。居民Ｍ話每日有好多主婦阿嬸之類以至各色人物等到羅湖買煙，帶返香港，出出入入，香港每包零售三十九元，羅湖免稅店售十二元，返到香港有拆家收晒，至於如何分錢，則非佢所知，但啲阿嬸如非有甜頭，邊度肯日日「返工」到羅湖買煙吖。
居民Ｍ仲有一點觀察，睇到不少人站在關卡前不願入閘，等到咁上下，夾啱時候，先至一齊湧入去過關，其中必有蹺妙之處，但佢就冇去考究咯。北區報販抗議私煙壓境，可以用純經濟理由解釋，就係羅湖賣十二元人民幣嘅一包煙，來到北區，必定售價少過香港價三十九元港幣。如報販守法，只賣香港煙，邊度夠啲私煙拆家鬥呀，輸梗，意思即係話佢地想每包賺一蚊都賺唔到。好多經濟學家都知，走私就係一種價格差異之套利行為，相等於股票，外滙之arbitrage（套戥）。套戥係合法嘅，走私就係非法，海關應該去緝私，以前夏鼎基時代港英唔肯加煙稅，就係諗到加稅會加劇海關負擔，增加緝私的支出，未必可以抵銷新增稅收。不過現在特區政府唔係咁諗，加煙稅以「健康」為擋箭牌，加煙稅會引起甚麼社會後果，經濟後果，一於勿聽勿視勿理會，私煙充斥市面，闊佬懶理咯。