港股上周四低位（21134）果然有支持，恒指噚日早市曾大跌621點，但落到21131立即反彈，之後跌幅大為收窄，且以接近全日高位收市，收21620，只下跌132點。不過，期指低水幅度擴大，有235點，投資者對美股跌勢仍有戒心。
大市快落快上，市勢比預期為強，上升正股有420多隻，噚日推介嘅恒盛地產（845）低開高收，最低3.28元，午後搶上3.45元，收3.42元，升1仙，成交2100多萬股，沽壓雖重，但「拜也」手瓜亦好硬，此股實值7.7元，現價實在好抵買，重上水面（4.4元）機會相當大。
國際資源（1051）逆流而上，收0.5元，升1仙，佢在0.42元至0.50元間橫行已兩個多月，近日走勢明顯轉強，一破位而上，初步上升目標係8月初高位0.71元。國際資源下周一（9日）舉行股東周年大會，相信會有唔少捧場客到場「索料」。
新華文軒（811）強勢畢呈，亦係低開高收，但升勢好勁，最低3.12元，午後有大盤扯吸，搶上3.32元收市，升幅3.4%，創今年新高，成交340多萬股，沽盤唔多，街外貨源已明顯歸邊，升勢會一發難收，中期上升，目標指向6.48元。
升破0.8元要追入
8月初推介晶門科技（2878），當時股價0.88元，其後升上0.98元便掉頭回落，跟住大部份時間在0.8元以下浮沉，噚日收0.76元，逆市升2仙，又可留意，畢竟中國電子信息產業集團（中國電子）呢間央企已買咗幾個月，並已成為大股東，持有24.5%權益，央企落得手，必有智珠在握，晶門日後必然會大變身，脫胎換骨。
中國電子在7月入股後，晶門股價在7月中開始的半個月內，股價由0.61元急升到0.98元，大升60%，現時在0.70元至0.80元又「打底」咗兩個多月，相信另一次急升已成熟，一升破0.8元阻力，即可追進，初步目標1.00元，中線1.20元。
郭兆誠