夠膽同中糧包裝（906）硬拼的中國高精密（591），人氣稍遜卻比人集資更多，似乎胸有成竹，咁低調博乜？
人氣唔夠原因又係輸個名，「高精密」完全係爆頭，原來佢做儀錶同監測系統，咁即係乜？就當做煤氣錶喇，不過產品唔係你同我用嗰啲咁簡單，客仔計有國家工程設計研究總院（國防及航天項目）、中石油（857）、鞍鋼（347）、上海電力、第一汽車等等。做得儀錶，就好似電力Fuse，一有漏電就會跳掣，換句話說即是監測系統，當佢被放喺石油管道時，身價當然不可同日而語，中石油塔里木及大慶油田就係用佢。
睇番成個儀錶行業，07年全中國生產值排名，佔個餅最大份就係類似以上嘅石油管道、電廠、航天工程等「工業自動化儀錶」業務，產值超過780億元人民幣，佔行業25%產能，而做鐘錶等下游嘢不足7%，加上過去幾年售價不斷跌，公司嘅石英錶芯業務由07年佔營業額35.9%，跌至今年上半年25.4%，取而代之當然係大大件嘅工業用產品，佔超過74%。
後台硬 毛利高
明白公司業務後，就要醒少少唔好當佢係手錶代工，後台嘅投資者叫蘭馨亞洲投資，雖然係來自香港嘅「外資」，但近十幾年一直活躍於「創投行情」，最近入股嘅仲有亞洲果業同美鑽石油鑽採系統，而美鑽客戶遍佈全球，包括殼牌、康菲石油、中石油同中海油（883）等。
呢個基金亦活躍於內地爆炒嘅創業板，首批股份已見佢哋手影。基金成立以來投資45家大型中國公司，當中15家已在美國等地上市，代表作係易趣網，03年以2.25億美元賣畀eBay；另外仲有武夷醫藥（1889）。最令人驚嘆係佢哋管理嘅資金只係7000萬美元，但好似開印鈔機咁湊大具潛力嘅公司上市，足見其眼光與財技了得。
自動化儀錶屬冷門行業，若上限定價市盈率為16倍，雖較威勝集團（3393）略高，但中國高精密有獨特業務概念，毛利高達47%，點樣部署自己識諗啦。
胡孟青