獅子行CEO紀勤坐住架私人飛機，日行萬里巡迴路演，真身上陣向員工講解策略理念，已經成為5號仔嘅經典場面，而集團旗下恒生銀行（011）揸弗人、女大班梁高美懿，系出滙豐，自然深得母公司獅子行真傳，重視同前線員工嘅溝通。
梁太噚日喺佢哋寶號嘅CEOblog度，透露之前到訪恒生港九新界共19間分行，落區跟同事接觸，聽取前線意見。所謂民以食為天，飲杯茶食個包，輕輕鬆鬆咁交流，就最能夠上下打成一片啦，好似佢巡區巡到荃灣港鐵站分行咁，堂堂CEO同一眾優越理財嘅女同事，蹺晒手丁字腳咁嚟幅美人大合照，又喺區內一間酒家同夥計齊齊食晏，難怪佢啲同事錫晒佢，親手整張心意卡送畀老細。