英超球星腰纏萬貫，住大屋、揸靚車。好似曼聯球員咁，平時去練波都好似做show咁，唔係揸法拉利就係揸平治、波子或者賓利。揸得靚車又點會唔開快車，但曼聯領隊費格遜為咗球員安全着想，落咗車速限制柯打，唔准佢哋喺練習場附近開快車。
費格遜落柯打限車速
英超球星開快車出事新聞多的是，好似今夏由曼聯過皇馬嘅基斯坦奴朗拿度（C朗），年頭往練習途中喺隧道炒車，好彩車毀人未亡。C朗架法拉利雖則totalloss，但佢就一啲事都冇。呢單嘢令費格遜關注到旗下球員揸快車嘅問題，於是決定將卡寧頓訓練場附近嘅車速限制訂喺時速20英里。
曼聯為免班球星當費格遜柯打係耳邊風，喺卡寧頓訓練場附近嘅馬路裝speedbump（減速丘）同警告牌，仲加裝咗閉路電視。班球星啲靚車部部都大馬力，要佢哋揸到「蟻躝」咁，雖則好難頂，查實都係為佢哋好啫！既然係咁，我求大俠建議佢哋可以買番部電動車；呢種車啱晒佢哋行「龜速」，又夠環保。
雖然曼聯球星有新規則要守，但無損表現，前晚喺英超主場贏布力般流浪2:0，繼續以兩分落後「1哥」車路士。呢場波紅魔「雙塔」里奧費迪南同尼曼維迪都因傷冇打，據聞前者嘅背傷幾嚴重，可能要唞8周；不過，呢位即將喺今周六滿31歲嘅英格蘭中堅，最近踢到慌失失，小休吓對佢同紅魔都未嘗唔係好事。
有口痕友話，里奧自02年7月由列斯聯加盟後，喺曼聯經已效力逾7年，捧過英超、歐聯同世冠盃等重要錦標。所謂「七年之癢」，里奧係時候需要一啲新衝擊，咁先可以喺足球攀上另一高峯。話晒曼聯同英格蘭國家隊現階段都仲好倚賴佢，希望佢快啲重拾狀態，再次展示瀟灑一面啦！