青年才俊Ｐ自美國回港工作，呢日在置地廣場碰到佢，行色匆匆，一路行一路睇住黑莓，幾乎碰埋左丁山度。左丁山叫一聲：「Ｐ哥哥，使唔使咁搏命呀，返到公司先至睇電郵啦。」才俊Ｐ企定之後講一聲：「對唔住，呢啲係壞習慣，倫敦就快開市，同事啲電郵即到，我忍唔住快快趣睇咗先。其實家就係趕返公司。」公司在哪？哦，就在交易廣場，好近啫，問佢係唔係在置地廣場吃過午飯就衝返公司，點知才俊Ｐ話：「唔係，我返嚟之後，搵唔到合意嘅屋，就住喺置地文華先，幾好吖，非常方便，住咗幾個月咯，感覺良好到極！」吓，你估呢家酒店夠平呀，長住幾個月？做投資真係好，公司公費住全城最貴酒店之一，視作等閒，唔怪得啲年青人個個發夢做投資銀行家或基金經理。才俊Ｐ又講：「太古廣場新開一間酒店SwireUpperHouse，就在萬豪酒店最高嗰十層，有無敵海景，與置地文華係同一類酒店，我去睇過，發覺房間比文華更大，海景又好，想話搬過去。但呢度位置好噃，我返上房間冲個涼又即刻可以行返公司搏殺，慳番好多時間，你知啦，我每日都在公司睇住o架，根本唔識放工為何物。」
聽聞太古要開一間新派酒店與置地文華競爭，原來已經開咗門營業，咦，諗起離太古廣場不遠嘅美利大廈又話要保育，改建成酒店噃，他日咪可以同金鐘四間酒店爭生意？於是下午趁有空，打個電話問吓酒店Ｐ，問佢點睇。酒店Ｐ嗤之以鼻：「林太講保育講到上晒身啫，美利大廈有甚麼保育價值？考起！間大廈位於花旗廣場隔籬，出入唔算方便，行去中環或太古廣場同樣咁遠，我做遊客就唔鍾意住嗰個位置咯，況且呢間大廈要保留外貌，內部要徹底改造裝修，先至成為酒店，粗略估計，成本可能高過拆咗再起過，條數點計呀，我地公司一於唔吼，除非售價夠平啦！」你就想嘞，政府經常講絕不賤賣土地吖嘛。究竟林太與屬下事先有冇調查市場意見先至決定將美利大廈「保育」成為酒店，木宰羊。新進局長之中，兩位最年輕嘅，邱生與林太最急進，一個環保上身，一個保育上身，因住欲速則不達，反而影響官運。