粵劇係中國優秀傳統文化，可惜特區政府偏偏未予重視，好多粵劇界人士已經多次就呢樣嘢同政府開拖，好似汪阿姐每次講起都相當勞氣。特區政府唔識貨，唔代表聯合國都咁冇眼光，事關經過多年爭取之後，聯合國教科文組織終於喺10月批准將粵劇列入《人類非物質文化遺產代表作名錄》，令唔少粵劇界名伶包括汪阿姐都好高興。
以林家聲借題發揮
民政事務局嘅曾德成局長忽然趕粵劇潮，喺佢嘅《局長隨筆》專欄中大談粵劇發展，話好高興近年罕有露面嘅大老倌林家聲近日專程由加拿大返港為建政60周年再度「開金口」，仲立即喺粵劇迷之間引起轟動，門票好快搶購一空，反映粵劇愛好者大有人在。
不過，德成局長呢頭講到粵劇仲有好多吸引力嘅時候，同時又嫌好似林家聲呢類具號召力兼深受粵劇迷擁戴嘅知名大老倌似乎唔多，同舊時老倌名角林立不可同日而語，似乎暗示，如果最終入場睇大戲嘅人數唔夠多，都唔好怪政府宣傳不力，可能係演出者未必夠吸引力。但係如果特區政府唔重視粵劇，試問又點有資源發展粵劇同留住人才？德成局長其實係唔係倒果為因呢？