財爺曾俊華上周一重陽節，以署理特首身份去中環和平紀念碑，獻花畀二次大戰中為保衞香港而捐軀嘅烈士，噚日佢喺自己個網誌度，大讚東江縱隊有貢獻。
東江縱隊港九獨立大隊係當年抗日戰爭時期由解放軍率領、港人組成嘅抗日游擊隊。財爺網誌先讚前任特首董建華回歸後，將為港捐軀嘅115位東江縱隊港九獨立大隊成員名錄，存放紀念龕中，同原有陣亡戰士名錄並列，確認東江縱隊貢獻。
曾俊華大讚東江縱隊為社會國家獻出生命嘅高尚情操值得尊敬，仲話當日出席嘅老兵代表，從佢哋嘅眼神，睇到對昔日同胞嘅懷念同尊敬。佢攞番陳年舊事嚟講，一般人未必有感覺，拉攏愛國愛黨傳統左派嘅意圖反而仲明顯。