民間組織唔係只識快閃、搞簽名活動、拉banner叫口號咁簡單，好似反對遷拆尖沙嘴碼頭巴士總站嘅「尖碼之聲」咁，今年4月就去咗越南河內出席第12屆聯合國教科文組織國際論壇，喺保育議題上同一眾學者切磋一番。
尖碼之聲升呢成功，主席陳嘉朗噚日喺分享會上表現得好雀躍，滿場飛之餘，仲同八方講聯合國對保育嘅睇法同尖碼之聲不謀而合，「保育唔係單單着眼於建築物本身，而應從整個地域去考慮，令社群嘅生活面貌得到保護。」佢話尖沙嘴碼頭巴士總站係現存維港兩岸最古舊嘅海陸運輸交滙點，有超過120年歷史，叫政府三思而行，唔好再做遷拆罪人。