今季「降呢」踢丙組嘅東方（白衫），經過噚日喺馬仔坑球場3:0輕勝駒騰後，已連贏7場，仲憑較佳得失球較壓住同樣連贏7場嘅浩運排榜首。我求大俠趁噚日冇甲組波，落去捧吓東方場，點知一開波已經飛沙劈石，駒騰球員頻以爛仔波招呼東方；但東方有歐偉倫同李健和擔正，梗係唔怕爛仔波，阿倫入一球12碼兼交出一個助攻，半場已領先3球，下半場見對手唔似踢波，先hea住踢冇「士哥」。教練兼球員和哥賽後話，呢場係7場丙組波入面最爛仔嘅對手，過程唔多似踢波，怕專程嚟捧場嘅球迷唔夠過癮。總監梁守志滿意球隊戰績，日後會畀機會提升上去甲隊嘅青年軍落場。