台灣歌手潘美辰前日喺四川做騷，傳聞佢同主辦單位出現誤會，而俾人軟禁近4個鐘。潘美辰經理人Cash噚日講述事發經過，佢話當晚潘美辰唱到倒數第二首歌時，主持人無啦啦上台送海報畀觀眾，潘美辰覺得騷擾到演出，問主持人可唔可以等唱完歌先送，點知主持借咗聾耳陳隻耳，唔理佢繼續派。
被困房仔
潘美辰冇辦法惟有唱埋首歌，諗住等佢派完先再唱最後一首歌，於是轉身落台，說時遲那時快，有個工作人員即衝上嚟話佢收咗錢未唱晒歌就想走，潘美辰即刻解釋自己未走，但工作人員唔理咁多，將佢同經理人送到一個細房仔，雙方對話中，潘美辰只覺得對方想博佢做多一場免費演出。
歌迷報警
因為潘美辰出唔到場謝幕，主持人乾脆自己唱歌謝幕，台下fans見唔到偶像再上台，覺得奇怪，認為事有蹺蹊，於是報警，卒之公安嚟到。對方解釋唔係綁架潘美辰，而係雙方溝通中，強調係一場誤會。最後潘美辰由公安同fans護送返酒店。Cash話潘美辰對成件事嘅感覺係「很錯愕，但沒被嚇到」，潘美辰下星期就返台灣宣傳新書同出年1月嘅演唱會，身心都冇事可以平安返屋企咪好囉。