喺機迷飛車、踢波、操鐵拳時，原來我哋個好朋友返咗嚟……機戰新作《超級機械人大戰NEO》喺Wii推出，聲勢唔算勁，但原來好多破格點，立體地圖唔再一格格，而且仲加入「包圍」、「押出」等新系統，可以圍揪又可以打人落樓！
文：阿洛
360℃移動無縫攻擊
玩咗咁多年，無論2D或3D地圖，都打開唔到一格格嘅枷鎖，嚟到Wii嘅Neo，竟然玩360℃移動，機體可移動範圍，會以環繞機體嘅圓圈嚟標示。而操作移動更係自由生動，碰到障礙物或高樓大廈時，會開動噴射器或跳躍；向敵方攻擊時，更會即時出現無縫地圖戰鬥動畫，只有出必殺技時，先會採用傳統動畫方法表現，戰鬥更爽快。
不過同時因為有障礙物，攻擊會分為直線、曲線兩種類，當敵我之間有障礙物，就只能夠使用有曲線能力嘅武器，更講求戰略性。
激鬥！黐埋牆碌落樓
以往機戰幾個圍一個，最多都係出合體攻擊，不過今次就新增「包圍」要素；即係如果我方機體，左右夾擊或四面包圍敵人，攻擊力及命中率都會有所提升。
而另一系統「押出」，則係利用地形優勢，使用有「押出」效果嘅攻擊命中敵人後，敵人會向後退，如果撞到障礙物會扣多啲HP，如果敵方企喺建築物或高地上被打到跌落樓或跌落山，HP會扣得更甘！
九十年代小兒科
今次《機戰》聲勢唔係好大嘅原因之一，可能係同參戰作品唔太吸引有關。除咗例牌撐場嘅鐵甲萬能俠、三一萬能俠及高達系列外，新加入作品以九十年代動畫為主，有《NG騎士》、《熱血最強》、《霸王大系龍騎士》等等，你唔識？我都唔係好熟！反而原創嘅男主角17歲高中生稻葉驅一行人，同啲機體、母艦就幾吸引，而且例牌可以打到尾，記得落力升呢。
Profile
遊戲：《超級機械人大戰NEO》
機種：Wii
製作廠商：BANPRESTO
類型：戰略
人數：1人
