市況波動，上周恒指波幅1143點，簡直係一日天堂一日地獄，足足有90隻牛證命喪黃泉，搞到個市冇晒貼價證，發行商大叫救命，要急度新證應市，但按上市條例要等足5個交易日先可以上到市，若然唔係經驗老到嘅發行商一早佈下天羅地網，每隔100點都「總有一隻喺附近」，都幾難喺波動市突圍，留住散戶的心。
強勢板塊梗係首推中資金融股，望吓個圖，隻隻清一色係裂口跌，裂口升，但成交唔配合，追住個DeepV入市好可能要吃眼前虧。要搵較清純抗跌力強嘅「冇裂口派」的確幾費心神，望咗一排發現冇裂口之餘，股價竟然可以再創新高嘅係做手袋嘅理文集團（746），知名度唔高但原來早於6月公佈要轉型搞太陽能，點知收貨收到10月中至開車。
同場加映真明麗（1868）疑似在大升市下被洗倉，何解「疑似」？皆因急跌落到10日線即收手，又係用手畫都冇咁準嘅震倉格局。
惠理手影睇季報
講開理文，一度係惠理基金愛股，股價過去表現絕對有交代。近期同獲惠理青睞增持嘅仲有重慶機電（2722）及南車時代（3898），兩隻都係「冇裂口派」，南車創新高後繼續走強，重機則穩穩陣陣，三線滙聚等爆邊。可見每逢股價落到較近惠理基金增持價，都有唔少醒目仔出嚟盡情接。
要追蹤惠理手影冇難度，睇季報就知。現時惠理旗下表現最好係ChinaGreenchipFund，今年回報84%，跑贏大市，其基金資產轉換之密，有如基金界嘅短炒王。
最新季報顯示，頭幾大持貨港股包括建滔化工（148），及早前介紹過嘅申洲（2313）、建行（939）、中海油（883），仲有美聯（1200）、越秀交通（1052）同汽車股。對比番上季，跌出十大持股嘅有天能動力（819）、敏實（425）及世茂（813）。短炒王手影下，部份仍持有嘅好似越通已有消息跟尾，即使未有消息嘅走勢亦不俗，不妨多留意。
胡孟青