台灣職棒聯賽「兄弟象」隊球星投手曹錦輝涉嫌打假波，行政院院長吳敦義下令調查。中國球員真令人失望，無論在大陸還是台灣，都有打假波、弄假嘅情況出現，全運會被稱為「錢運會」，良可嘆也！中國足球隊就係咁樣成為「東亞病夫」，對住日本南韓就會腳軟，未打先輸，搞到胡錦濤要提出重振「志行風格」，容志行係好波之人，但好唔過「香港之寶」姚卓然，即使係容志行領軍時代嘅中國隊，成績同樣係麻麻地啫。
打假波不是中國獨有，可以講話防不勝防，棒球投手要打假波最易，五隻手指輕轉一轉，手臂腰部唔配合，投球失常話咁易。足球有十一個人，要全隊一齊打假波難度甚高，人人通派就唔易守秘密，而且容易畀球迷識破。左丁山賭波，盡量投注英超聯，除咗比較熟悉之外，主觀上覺得英超球隊有一股鬥志頑強風格，有打甩門牙和血吞嘅精神，如果打假波，駛唔駛腳腳去盡呀？西班牙、意大利足球經常慢吞吞，打組織，速度慢，做假就相對地容易，故此左丁山盡量不投注，避免假波風險，例如皇馬以零比四輸畀丙組鄉下球隊，真神定假鬼呀？
現代體育向錢看，教育何嘗不然。睇吓《金融時報》嘅EMBA排名榜，香港科技大學與美國西北大學合辦嘅課程係世界第一，排名榜之一個重要準則就係畢業生人工夠高，加薪幅度夠大，仲唔係向錢看？讀EMBA唔會追求學術，只為追求一張沙紙，一年多嘅嚴格商業教育，為咗有一張沙紙令自己搵工易啲，薪水多啲，純粹係向錢看行為。想唔到嘅係，英國「就業和技能委員會」發表報告，英國大學排名制度嘅標準，應該按學生滿意度、學校輟學人數與畢業生收入高低，來決定學校與課程嘅排名，學校須要與社會配合，開辦課程切合僱主的需要，以獲得更高評分。嘩嘩嘩，咁嘅排名方法，英國大學咪變成職業訓練學校？人人讀律師、會計師、金融等科目，排名實高啦，文學戲劇歷史哲學系可以收檔，假如香港有呢類報告，一定有大量文化左派齊齊炮轟，不過係英國報告噃，或者有人要求香港跟風呢？