剛在亞協盃4強出局的南華，昨於大球場舉行的聯賽大戰，以1:2不敵傑志。連續3次輸給宿敵，加上今季聯賽不敗身被破，輸波兼輸面，難怪南華足主羅傑承賽後怒氣冲冲，黑面邊走邊說：「爛泥扶唔上壁！」便拂袖離場。
南華上周在亞協盃不敵科威特競技4強出局，但成功迫爆大球場，球迷的熱情令南華足主羅傑承賽後感動得淚灑球場，並高呼「香港足球未死！」南華昨午在同一場地硬碰宿敵傑志，吸引到5,442名球迷入場，為今季港甲入場人數新高。
華將比拼傑志贏晒
昨仗其中一個焦點，是兩軍華將的正面對決，單論此戰的進攻組織，南華中前場是完全被林嘉緯、盧均宜、陳文輝、高文，配合西班牙中場拿素爾的傑志中場線比下去。南華今仗防守頻有甩漏，加上無法將入球機會轉化為「士哥」，最後僅能靠卡里祖的12碼破蛋輸1:2，連同上季已連續3場負於宿敵。羅傑承賽後氣得急步離場，留下一句：「爛泥扶唔上壁，對三流外援嘅球隊都踢成咁。」南華輸波後，以4戰9分守在第5位，而傑志以6戰11分升上榜首
少林兵身心俱疲
南華教練金判坤賽後向南華球迷致歉，並承擔輸波責任，但認為球員經過早前亞協盃後確實身心俱疲：「雖然球證未有判罰12碼，但球隊上半場有很多機會，只有一次命中目標，這是另一問題，而下半場表現在水準以下。」傑志教練甘巴爾下半場尾段被逐離場。
對於港隊只挑選傑志隊長盧均宜入伍，兼任港隊教練的金判坤指出，傑志其餘華將過去幾仗表現一般，但此戰表現確實出色，如保持表現便會挑選他們。
傑志總領隊伍健賽後盛讚陣內華將表現出色，特別點名稱讚首開紀錄的陳文輝：「我們今日冇針對南華作任何部署，只要求踢回本身風格，而華將的表現應入選港隊。我唔可以講此踢法一定贏，但希望吸引球迷入場。」傑志此戰贏波，各將得1,400元獎金。本報訊
甲組聯賽昨日賽果
傑志2:1南華
入球者（傑志）：陳文輝8'陳偉豪59'（烏龍球）
入球者（南華）：卡里祖73'（12碼）
入場人數：5,442人
門票收入：$159,740
《花絮》
野人帶囝囝撐舊主
野人前鋒迪天奴（右）雖然今季過檔公民，但話晒喺南華效力過3季，噚日就帶埋囝囝（中）入大球場捧「少林寺」場，但點知最後只能同坐喺隔離嘅巴西同鄉、南華守衞沙域臣（左）見證舊東家輸波。
靚太幫傑志派糖
噚日係哈囉喂正日，主隊傑志就喺場內派糖，連球隊行政總監朱志光嘅太太（右一）都親自落場派糖，等啲球迷可以應吓節同感受吓節日氣氛；除咗有糖食，球迷仲可以拎埋球隊今季設計精美嘅特刊㖭。
波男化身魔鬼應節
雖然噚日場波喺烈日當空嘅3點鐘開波，但喺場內都有唔少「鬼」出沒。客軍南華嘅吉祥物波男（圖）都唔執輸，身穿斗篷，手執三叉戟，一身紅魔鬼造型喺場內為南華搞氣氛同吶喊助威。
