領匯瘋狂加租辣㷫租戶，香港西醫工會加入本月12日嘅罷市行動，但香港醫學會叫停，更發信呼籲醫生唔好貿然行動。
醫學會前會長蔡堅噚日好勞氣咁同八方講，其實醫學會已經同領匯有共識，如果醫生認為加幅唔合理嘅話，會另外搵測量師估值作參考，有講掂數先例。
佢話唔明點解西醫工會要呼籲罷市，一來罷市時間由中午12點至下晝3點，根本好多醫生不嬲都係呢個時間小休；二來罷市好唔道德，如果日後搞到全日罷市仲大件事，病人有事點算？蔡堅又指如果議員梁家騮出吓聲，就唔使佢老人家出手啦，既然都係搞着佢，要認真考慮下屆參唔參選咁話。