海洋公園上月開始加價，成人門票由$208，加到$250，加幅兩成，都幾貴；早前佢仲偷偷地將中學生團體票狂加56%，後嚟畀學校踢爆先暫停加價同回水。公園瘋狂加價，市民自然唔高興，唔知係咪入場人次減少，早幾日突然公佈由本月起推出「$88衝多轉」優惠。
優惠係本地遊人凡喺今個月1日至30日，喺指定地點購買海洋公園成人日間門票兩張，即可憑票到海洋公園票務處以$88優惠價換購日間門票一張，有關優惠門票只限明年1月4日至2月12日使用（查詢：39232323）。
「要啲人短期內玩多轉」
$88一張海洋公園成人門票表面好似好着數，但小妹同旅行社協會主席胡兆英傾開，原來唔係真係咁抵。胡兆英話，買兩張正價成人門票可以$88買多一張，但一般人唔會一個人再去海洋公園，咁就係要逼啲人多買一張正價門票，㩒吓計數機，三張$250正價門券加多一張$88優惠門票，平均$209.5，只不過係回復未加價之前水平。當然，都比家正價每張平幾十蚊，但係要啲人短期內玩多轉，除非好鍾意海洋公園，否則唔係人人都可以玩得咁密，「如果真係咁鍾意海洋公園，不如買全年pass仲抵！」
電郵：mailto:[email protected]