當金牌大風老闆鄭東漢將多年拍檔黃柏高擺歪，然後扶植兒子鄭中基接班後，非太子黨的旗下藝人出現鳥獸散。親太子黨的鄧麗欣（Stephy）獲公司寵愛有加，威脅她的同門傅穎（Theresa）卻遭冷待，精靈的Theresa當然不會坐以待斃，她高調要求與公司解約，更迅速加盟星皓，到新環境後，Theresa感到豁然開朗，心情有如衝上雲端般開心。問到Stephy還是朋友嗎？她思索一會說：「舊同事。」當年同是Cookies成員，今日關係連朋友也不是，怎不教人感到欷歔！ 撰文：陳月媚
事業篇 迷惘期瀕臨崩潰
傅穎跟金牌大風與TalentBang公司原本還有兩年合約，但當她發現公司不會投放資源在其身上時，幾個月前她就決定向公司提出解約，而代表金牌大風的CEO陳輝虹雖然公開表示會無條件與她解約，但當Theresa透過律師發聲明接受無條件解約，並爆出加盟星皓後，事情急轉直下，舊公司發聲明指她違約，將會採取法律行動，雙方隨時要對簿公堂。
離開金牌有苦衷
在合約問題未解決前，律師已吩咐Theresa對外最好不要談及與舊公司的糾紛，以免影響官司，所以日前她接受本報專訪時，回答問題顯得格外小心。不過看得出轉投新公司後明顯心情愉快，對於未來的前途充滿憧憬，她說：「今年係我人生轉捩點，家真係開心咗好多，之前我對前途仲好迷惘，覺得壓力好大，但遇到星皓呢間公司後，我對未來嘅發展路向就比較清晰，同時我亦明白離開舊公司後，難免會多咗是非，不過新公司已經安排好畀我去北京學做戲同練歌，先好好裝備自己，然後再戰江湖。」
在金牌大風6年，問Theresa最後是否帶着脫苦海心情離開這間公司？她說：「其實離開一間合作咗6年嘅公司都要經過一番掙扎，唔會話完全冇感情，但要選擇離開，當然係有我苦衷，但家合約嘅嘢已經交晒畀律師處理，現階段真係唔方便講得太多。」
情緒壞喊到失聲
外界一直認為Theresa離開舊公司是因為與親太子黨的Stephy不和，處處受到打壓才會決心離開？Theresa否認說：「Stephy唔係我離開公司嘅原因，我只係想轉新環境，喺過去呢半年，我情緒都好差，覺得好迷惘，好似得番個軀殼咁，情緒最差時，係可以喊到崩潰，收唔到聲。」
這段低潮期，Theresa的家人很擔心她，但又不知道可以如何開解，直至遇上了星皓老闆王海峰，恍如見到救星。她笑說：「我真係冇誇張，喺情緒最差嘅半年，真係好無助，唔知點算，又唔同得人講，感覺係衰過失戀嗰陣俾仔飛！後來朋友介紹峰哥畀我識，佢公司想同我合作，又講咗畀我聽，將來會點幫我發展，我嘅心情即時好似由谷底變成上咗去雲端。」
在過去半年，發生了兩件事令Theresa好感動，她說：「喺今年嘅書展，我啲fans自發幫我買咗好多書嚟支持我，唔想我失威。另外一次係我一個人去到廣州做商演活動，現場幾百個fans齊聲喊：『Theresa，你會快樂的！』呢一刻我終於忍唔住，感動到喊咗出嚟，佢哋實在太窩心啦。」
同Stephy保持競爭
雖然Theresa強調離開舊公司並非因為Stephy，但問到她與Stephy還是朋友嗎？她遲疑一會說：「我好珍惜當年Cookies嘅時間，令我可以有一個美好回憶，不過同佢哋私底下已經好少聯絡，至於同Stephy……咪係舊同事，大家保持良性競爭。」
感情篇 唔急拍拖急練歌
幾個月前，傅穎在《勁歌金曲》表演時，因為走音遭歌迷勁噓，這次對她打擊頗重，也許她需要一些時間才能挽回自信：「早排我真係好怕公開上台表演，因為上次嘅陰影好大，我都需要時間去重拾自信。如果係自己表演唔好俾人批評，我係接受嘅，知道自己唱歌唔夠好，呢排我都好努力練歌，等將來再公開表演時，希望可以盡量做到最好。」
稱感情交白卷
早前傳出Theresa與棒棒堂的敖犬演出《舞動青春》時擦出愛火花，上個月她生日，她還去了台灣會情郎，不過對這緋聞，她沒好氣說：「上次去台灣旅行，我係同女性朋友去慶祝生日，我同敖犬真係冇拍拖，雙方只係朋友關係，家我可以好大膽講，喺感情方面，完全係交緊白卷，但我又唔急拍拖，因為仲年輕，反而想喺事業方面做番一啲成績出嚟先。」
