前奧運冠軍、國寶級跳水皇后伏明霞嫁畀前財爺阿松後努力「生產」，轉眼已是一女兩子之母，噚日同阿松一齊出席國際小母牛香港分會慈善活動時，話照顧剛升小一嘅大女司渝及讀K2二仔皓嘉夠晒忙，間中又要去內地農村扶貧，所以三個夠晒數，收工唔會再生。
「現在少做運動」
三十有一嘅伏明霞噚日身穿大會黑色T恤，都掩蓋唔到富泰氣質，戴埋黑超更加有闊太貴氣，同喺跳板上彈彈吓英姿判若兩人，受訪拍照時助手又頻頻為佢整理頭髮，排場猶如大明星。
伏明霞話早前同老公及前高官葉澍堃探望安徽農村，撐船10分鐘已經腰痠背痛，「因為現在主力照顧孩子，少做運動了。」自己退役，有冇諗過栽培子女接班呢？佢話個女好鍾意游水，但唔識跳水，冇想過做專業運動員，小朋友運動想鍛煉身體啫。連生三個真係湊到氣咳，日日照顧佢哋起居飲食同功課都好忙，「應該不生了﹗」