諗出派慳電膽券畀市民，變相為加電費開綠燈呢條絕世好橋嘅環境局局長邱騰華，喺大商家眼中，肯定係一個好官。八方咁講並非無中生有，亦唔係惡意中傷，邱騰華噚日出席國際環保博覽座談會，同100個學生暢談環保之道，指香港啲垃圾堆填區管理得好好，建議大家有時間不妨組團去遊覽。
與超人一唱一和
香港呢個名由來，其中一個講法係因為買賣香噴噴嘅「莞香」，局長反其道而行將臭氣熏天、只宜遠觀，不宜遊玩嘅堆填區推介為旅遊景點，提議市民組團去玩，八方有理由相信佢係受到首富李超人感召先至咁講。
以將軍澳堆填區為例，環保署一個月閒閒哋接獲幾十宗臭味擾民投訴，好多人應該記得，李超人推售新盤領都時，盛讚堆填區環境心曠神怡，小超人則話空氣清新，邱騰華同首富父子一唱一和，睇嚟已經得到孤獨推銷員真傳。
先為加電費鋪路，再為樓盤錦上添花，對於富商，邱騰華真係幫得手，至於普羅市民，局長就唔係咁講法，有個住在沙頭角嘅學生向局長陳情，指丁屋建築商將廢料傾倒在溪澗，搞到生靈塗炭，盼望局長介入。
面對學生求助，邱騰華好認真咁發表三點回應，一係難執法，二係涉及官地方可檢控，三係希望市民自律。講咁多嘢，實情一句到尾：幫你唔到。不過高官又點會承認無能為力呢？雖然慳電膽券被民意打殘，邱騰華卻話施政報告仲有好多項提倡環保措施，大家唔應該只着眼一個小小嘅燈膽，對於市民無留意其他綠色政策，真係好可惜。
環保要知行合一
市民懶理環保措施，係因為施政報告一味炒冷飯，興建行人天橋、隧道，減少路面車輛，鼓勵用電動車、減少排碳等，呢啲嘢有邊一樣唔係講完又講呢？市民並非不知道，只係官員做唔到，邱騰華唔好無中生有、惡意中傷香港人，佢噚日亦都有講，環保要知行合一，綠色和平要求煲呔出席12月舉行嘅哥本哈根氣候變化會議，但一直無回音，邱騰華好應該進諫煲呔知行合一啦。
mailto:[email protected]