粵語片武打明星林蛟（蚊叔）昨日猝逝，其生前摯友及愛徒接獲蚊叔死訊後均深感痛惜。與蚊叔相識逾半個世紀的司馬華龍，昨日慨嘆老友一個個離開，令他感到心酸；蚊叔愛徒白彪則透露一班弟子本計劃下月為師傅舉行壽宴，豈料喜事如今竟變成白事。
現年88歲的司馬華龍，早在粵語片時代已跟林蛟相識，昨日他在電話中得悉蚊叔猝死消息後大表愕然，並不住慨嘆說：「我同佢好熟好老友o架，不過我都有一段時間冇見佢，上兩次飲茶（演藝人協會每月茶敍）我唔舒服冇去，行路都要攞住支枴杖。唉，家真係好慘，啲老友好似石堅同林蛟咁一個個走，睇見都心酸。」
邵氏執教鞭
身為蚊叔徒弟的白彪，昨日是由師弟口中得知師傅猝逝消息，他在電話中說：「以前我同狄龍、陳觀泰同高雄喺邵氏讀訓練班嗰陣，蚊叔教我哋一啲技能同反應，以及騎馬同跳彈床。本來下個月14號我哋幫佢做生日，點知家突然去咗……喜事變成白事，真係好突然。蚊叔嘅後事，我同一班師兄弟都一定會幫手。」
摯友讚疏財
與蚊叔熟諗的邵音音表示經由狄龍知悉噩耗，回想老友生前種種，她大讚蚊叔仗義疏財，她說：「佢係我哋會員（演藝人協會），佢好照顧啲老人家，過時過節都會封利是畀啲長者。當我聽到個消息時都嚇一跳，因為之前蚊叔喺屋企都試過跌到塊面瘀晒，早幾日又腳腫入過醫院，啱啱先出返嚟，估唔到今次咁突然。我諗最傷心應該係狄龍，佢一入行就係由蚊叔教佢做戲同功夫，死訊仲要由佢話畀啲師兄弟知，你話佢會幾難受。」
演藝人協會副會長張權對蚊叔離世也表示惋惜，他說：「今日5點幾收到狄龍通知，話蚊叔喺深水埗行行吓街暈咗，之後白車送咗佢入明愛，不過後來都係唔得。佢啲契女去到醫院就通知佢個大仔，家我哋演藝人協會都有人喺明愛幫手。」張權表示蚊叔身後事會由其家人處理，若有需要演藝人協會願從旁協助。
阿姐嘆可惜
八和會館主席汪明荃（阿姐）昨日接受無綫娛樂新聞台訪問時，提到蚊叔的死訊，她說：「好愕然，蚊叔係八和會館一個好資深嘅會員，對電影界貢獻好大，咁資深嘅演員家買少見少，真係好可惜。」
採訪、攝影：戴彩煥、何永寧
