曾特首還擊「個別報章」，似創下本地政治歷史先河，問報館前輩，佢話未曾見過有港督咁樣做過，但前輩又話：「港英時期，尤其是八十年代之前，邊度有報紙敢公開痛罵港督呀，稍有不敬批評，我哋就會收到新聞處電話，或者華民政務司垂詢。韓才子落一條標題：『打炮廿一響送御妹過海』，已經震動一時，幾乎累親《明報》啦。現在新聞評論啲自由法，前所未有，新聞處無人理會，邊度敢打電話去報館責怪呀！」
曾特首雖然表現甚激，但未敢指名道姓，講個別報章名字，奧巴馬就唔同，創近代先河，點名批評「霍士電視」，白宮兩員大將艾曼姆與艾斯洛在其他電視台直指霍士電視不是新聞機構，而是意見工場，又動員國會議員、《時代》專欄作家助拳，於是白宮大戰霍士呢場戲好睇過花燈。特首辦職員聽講鍾意《白宮羣英》（WestWing），唔知係唔係有樣學樣，抄奧巴馬嘅公關劇本呢？
美國喜劇電視節目主持人JayLeno訪問奧巴馬夫人，問佢幾條問題，其中一條係：「總統先生鍾意有世界和平（worldpeace）吖還是白襪隊（WhiteSox）贏到世界系列賽？（WorldSeries，即美國棒球大聯盟冠軍爭霸戰）」總統夫人笑起嚟，等咗一秒先至講：「總統喜歡世界和平，但唔介意白襪隊贏WorldSeries。」Leno幽佢一默：「世界和平更加容易達到！」奧巴馬係芝加哥白襪隊擁躉，可惜呢隊波有幾十年未入過季後決賽，想話贏大聯盟冠軍，難過阿富汗和平繁榮。
WorldSeries已經開始，由上屆冠軍費城Phillies與紐約洋基隊爭標，七場四勝，費城先贏第一場，應該好有睇頭。洋基隊一年嘅薪水支出高達二億美元，全美最高，比Phillies高出八千八百萬美元，相當驚人。係唔係有錢佬大晒？在體育比賽嚟講，未必一定係，但費城在一百二十七年來只贏過兩次冠軍，而洋基隊已贏過二十六次，可見金錢係有威力嘅，用得其所，洋基隊內球星如雲；金錢用得失當呢，睇吓台灣就知道。台灣學人搞職棒，越搞越失落，竟然只剩番四隊參加職棒聯賽，仲爆出打假波醜聞㖭，前美國職棒大聯盟球員曹錦輝（LADodges，KansasCityRoyals）涉案，真係醜死鬼。