馮仁昭四圍超：新片演技大挑戰　鄭融拋胸濕吻女同志 - 馮仁昭

喺樂壇一向以性感小辣椒形象示人嘅鄭融（Stephanie），最近有份演出新戲《關人7事》，今次可以話係演技大挑戰，因為喺戲中Stephanie要扮演女同性戀者，仲要同新人陳楚喬（Carolyn）演出一場濕吻戲，認真一大突破。

拍檔尷尬頻NG

今次係Stephanie第一次演同性戀者，戲中造型同平時唱歌差唔多，不時以小背心短褲示人，當中更會酥胸半露，加上手臂畫滿假紋身，相當性感，除咗吸引戲中嘅Carolyn之外，仲俘虜戲中扮演蠱惑仔嘅陳偉霆。戲中Stephanie更加要同Carolyn濕吻，難怪佢哋拍攝前都相當緊張。
Stephanie拍完仍戰戰兢兢話：「雖然我平時同女仔朋友都玩得好埋，但絕對唔會嘴對嘴，所以內心都好掙扎，我唔係話怕尷尬同唔衞生，而係怕自己做得唔好，加上劇情仲要我做主動，好彩導演畀信心我咋，希望Carolyn唔好俾我嚇親。」Carolyn就直言拍攝時候當然尷尬，搞到佢面都紅晒，所以最後都要NG幾次導演先肯收貨。