人稱「米老鼠」嘅前投資推廣署署長盧維思（MikeRowse）去年底退休，離開官場去咗科大做MBA課程顧問，喺清水灣青山綠水之中逍遙咗成年，米老鼠下周二終於出關，去香港外國記者會演講，講吓對所謂部長制嘅政治任命局長、副局長嘅睇法。
演講實情只係配菜，主菜乃係佢潛心力作，大爆當年維港巨星匯內幕嘅新書，新書名為"NoMinister&No,Minister"，有個副題"TheTrueStoryofHarbourFest"，顧名思義，米老鼠有大鑊要爆，當年佢已經揭開唐英年想刪除會議紀錄，意圖卸責嘅內幕，此書一出，準備埋位選特首嘅唐公子要搵定擋箭牌嘞。