恒地（012）以近百億元補地價，搞掂馬鞍山落禾沙住宅項目。地產商做生意，點會死錯人？好似四叔話齋，落禾沙住宅項目起好之後賣出街，每呎售價過萬唔出奇，項目「大把錢賺」！
喂，馬鞍山至喎，都可以賣過萬蚊一呎？咁你話，香港樓市前景點睇？有樓在手者當然感覺大有錢途，咁無樓在手係咪仲要日嘈夜嘈？不如積極諗計努力賺錢仲好喇。
其實，如留意本港各類物業買賣趨勢，不難發現市場的確多了一股外來購買力量，所指當然係內地買家，而且呢班人「購物」趨勢仲唔止愛上豪宅，連工商舖都開始染指，股友只要花些少工夫翻查資料，即知近月唔少具內地資金背景嘅企業頻頻出手掃甲級商廈。據悉佢哋肯入市，係因為喺人民幣升值效應之下，香港物業變得十分吸引。
另外，施政報告提出活化工廈後，唔少工廈變得「值錢」，大陸佬做生意或投資好實際，將來無錢賺又點會同你癲？從趨勢判斷，可知後市工商舖成交量將漸見活躍，買入美聯工商舖（459）作中長線投資，回報或令人意想不到，起碼脫離「仙」班晉身毫子股。該股昨升3.2%，報0.064元。公司中期純利1764萬元，按年倒退38%，但業績已成過去，炒股要睇前景。
方星俠