上月燈神
新一屆記協盃11月中又開鑼，但係畢傑再冇份踢，因我已在蘋果隊掛咗靴兼高掛23號球衣，係時候讓番個霸咗兩屆嘅正選位出嚟啦！
禮拜四一班好朋友、好同事、好隊友，為畢傑搞咗場告別賽，喺度想借本欄小小位賣廣告，逐一多謝出席人士：烈、牛、偉仔、祖、康、蘇、明、謝夫、細Ben、女米高、柏麟、輝仔，另法比奧嘅愛在心中。要特別多謝嘅，梗係場波嘅搞手牛兄啦。
呢場告別賽各位果然好畀面小弟，謝夫數度瞓地扮飛鏟俾我推過，牛兄接咗龍門球再擲番畀我任射，搞到我好似阿柏天尼、伯金嘅告別賽啲老將咁，要隊友讓路先有波入。我重申，嗰日我大演帽子戲法，只有第1球係送嘅，哈！
隔籬位個小妹周麗，係咁叫我喺本欄提埋佢送嘅figure，好啦，多謝埋你隻JanieDoll，等我可以同Sid放埋一齊。貼士時間，9連勝後斷路，上周又贏番，信我要周日華倫W。
畢傑
近5場往績：WLWWW
主客和：華倫西亞勝
心得：華倫齊晒人