當年佘詩曼和張智霖（Chilam）因拍劇而傳緋聞，結果Chilam老婆袁詠儀（靚靚）一直視阿佘為眼中釘。近日靚靚和阿佘合演新戲，因此再傳靚靚出招追殺阿佘。前晚靚靚現身為傳聞解畫，她強調兩人敵對關係是傳媒塑造出來，由性格來看，靚靚認為絕對可以跟阿佘成為好朋友。
早年佘詩曼和張智霖合演無綫劇集《十月初五的月光》而傳緋聞，當中更指是女方向男方發電狂冧，緋聞一直沒完沒了。近日阿佘和靚靚一同拍攝無綫和邵氏開拍的電影《72家租客》，結果再傳靚靚出招追殺阿佘，前晚靚靚到將軍澳電視廣播城錄影《至八女人心》，談到傳聞她笑笑口回應。
「唔係咁姣」
靚靚說：「其實係傳媒朋友造出我哋嘅關係，我同佢冇合作過，但照睇大家性格係可以做到朋友，嗰日開鏡我見有傳媒影佢走光相，我幫佢遮住，唔係人哋所講咁姣。」對於被指爭視后，靚靚笑言根本沒想過，但現在傳媒提一提，令她恍然大悟，靚靚笑稱：「咁都等我扭吓計。」
阿佘心情好
而阿佘前晚則到黃大仙，出席謝雪心宴請《宮心計》演員食齋，提到靚靚追殺傳聞，阿佘笑稱：「我唔知有咁嘅報道，亦都唔會理，唔會影響我心情，家我沉醉喺《宮》劇嘅收視入面，一部劇播咗只有兩個星期左右已經有兩次慶功，我10年裏面都冇1次，真係好開心！」
至於又有傳阿佘插同劇楊怡，她笑稱：「點插？用乜嘢插？傳媒想像力太豐富，唔好再破壞我哋嘅關係。」傳和阿佘分手的鄭嘉穎當晚則未有出席。
另外，葉翠翠被問到有傳前男友向她追天文數字分手費，她又被人拍到在窗邊似是落淚，翠翠說：「冇可能，我喺窗邊只係化妝，否則我唔會坐窗邊。」她強調自己不如外界想像脆弱，翠翠強調一切已過去，傳聞有影響她的心情，但她會努力展望將來。
採訪、攝影：王崇穎、何慧斯
