上月盟主
上周命中重心里昂「大」，不過呢班波失波太多，輸咗個總入球過關，連埋配腳磐田山葉W，都可以領先3球之下，畀名古屋鯨魚迫和3:3，結果只微賺100分，真係唔抵。
今個月最後一次同大家見面，又適逢萬聖節，自然要應下景，一於博里昂作客擊敗「聖」伊天，喺呢個西洋鬼節揚威。
里昂暫列法甲第3位，作客16位嘅聖伊天，個客W竟然有成1.88倍，咁好分當然唔會莊家開錯；今仗其實里昂都有疑問，好似後防傷兵如安達臣基巴、保迪馬、保桑等未復出外，更有門將洛里斯同中場卡斯唐受傷料缺陣，而且下周中又要主場對利物浦呢場歐聯大戰。
里昂前鋒份量足
不過里昂喺歐聯已經9分在手，今次對紅軍和波就夠出線，就算真係輸，未來仲有兩場，相信出線都冇危機，點都要係法甲聯賽認真番一次。雖然里昂傷兵多，好彩中前場都夠份量，尤其國腳前鋒巴菲迪比高美斯今季從聖伊天加盟，喺呢個場踢慣踢熟；高禾、利辛度盧比斯等前鋒狀態亦好，唔愁冇波入。
聖伊天傷兵多
聖伊天近況亦唔好得好多，上仗主場都輸畀華倫西恩斯，聯賽兩連敗，另外仍有穆罕默杜達保、蘭連、巴耶沙爾等傷兵；唔信里昂聯賽3連敗，博佢作客贏波。
周中意甲加開快車，國際米蘭就最神奇，主場5:3贏巴勒莫，開呢啲主其他真係少見，周日佢哋作客利禾奴，對手疲弱攻力，國米贏波攞3分唔難，但唔信佢地歐聯前夕可以大炒，又博「讓球主客和」「和局」。
牽牛
近5場往績：WLWLW