家有一老，如有一寶，保安局有齊三寶，幾個紀律部隊退休高官，李少光、黎棟國同盧奕基都「翻閹」進駐保安局，議員涂謹申噚日辯論施政報告時，大讚保安局係最敬老部門，變成退休紀律部隊高層俱樂部，自己人圍威喂真快活。
堪稱敬老模範單位
港府提倡老有所為，保安局喺呢方面堪稱模範單位，不惜大花公帑培育退休官員成為政治人才，真係用得唔好嘥，其他政策局、部門應該好好學習，八方強烈建議特首辦應該率先響應，翻閹前特首回歸，再培訓治港政治人才。
涂謹申又指保安局循環再用退休高官，令接班問題無後顧之憂，廉政專員湯顯明、警隊一哥鄧竟成日後都可以投身保安局，總好過幫大孖沙打工咁屈就啦，至於已經係地產商下屬嘅警隊前一哥曾蔭培，梗係歡迎佢歸隊啦。
煲呔鐵腕禁毒，禁毒處擬增設多一個副秘書長做宣傳工作，涂謹申認為大可慳番，因為保安局人手充足，要搵啲嘢畀副局長黎棟國、政助盧奕基做先得o架！