家啲薄屏電視好普遍，主流畫面尺寸由37吋「升呢」到40吋或42吋，對聲畫有啲要求嘅用家都鍾意買套備有喇叭、DVD播放器連擴音機嘅家庭影院組合，駁埋薄屏電視大玩環迴立體聲，又唔使逐件買喇叭、擴音機自行組合咁麻煩。家啲家庭影院組合一啲都唔失禮，啲DVD機配備增線功能，將標清畫面增線至720或更高嘅1080線嘅高清畫面，咁樣睇大電視畫面都唔會起格啦。
LGHT304S平靚
巿面有林林總總嘅家庭影院組合，小藍都唔知點揀。消委會最近測試咗12款家庭影院組合，價錢由$1,790到$10,800不等，測試佢哋嘅音響質素、視像質素、使用方便程度等。喺2.1聲道嘅類別，以Bose嘅3.2.1GSlll套裝總評分最高達3.5星（滿分係5星），但價錢過萬蚊。SonyDAV-F200雖然屈居老二，但只係賣$3,980，格價贏晒。
5.1聲道組合類別PioneerHTZ-LX61、LGHT304S同樣獲得四星評分，成為購買首選，前者有靈活嘅前置環繞聲設計，配合附送嘅自動揚聲器設定咪，方便用戶擺放喇叭，仲有埋SACD播放功能，賣價$7,990；後者讀碟能力超強，最大賣點夠平，售$1,790，比Pioneer平咗78%，真係平靚正之選。無線後置揚聲器5.1聲道組合以SonyDAV-DZ870KW評分最高有3.5星，售$4,980。