所謂無殼蝸牛的遊行，人腳單薄，顯示香港人只有極少數存有這種愚昧想法。
認為必須有樓揸手，上到車，至係老闆。得，香港遍地機會，你不擇手段上位和上車，過程和效果都是自己負責，政府決不插手。議員壞心眼做壞事，將一批被標籤無殼的蝸牛夾硬推上車，結果那隻蝸牛永遠揹住一隻跟身體不成比例的巨殼。為了背上的巨殼捱世界，替銀行利息打工，望按揭利率生畏，節衣縮食，為供樓款額抓狂。為一間石屎屋，就算做業主的你私下稱呼它1388風水樓，它的價值，跟你犧牲的自尊（譬如老闆性騷擾，你得忍了他）和背負的心理壓力，根本不成正比。那隻本來屬於別人的殼由你來揹，法律上，你叫做業主，萬一出事，你的風水屋叫做銀主盤，比蝸牛更身不由己的閣下，叫做破產人士。傳媒雪中送炭，稱呼你們做「失敗無產」。你終於發現，當日遊行的那個無殼身份，是大整蠱，因為你們歡天喜地跟地產商做完交易後，那隻殼落實了，睇真些，原來是一隻鑊。鑊不論從39/F或者有趣地跳上88/F，忽然空降跌落你頭上，都不可能是盛事。
遊行隊伍有廿歲出頭月薪萬多元的年青人，十五歲時已經確認，人生的目標就是置業。地產商真本事，這一代的青年都給樓盤廣告洗晒腦。置業後又點？地產商遲早包攬埋陰宅生意，人生一條龍，三十歲買樓四十歲搶購風水龕位，誰曉得內地豪客幾時來炒這個。到時叫價四億一位，後生仔敢入市嗎？係咪嫌命長？