大市近一輪行情明顯係要跟風向炒，未等到深圳創業板正式開通，資金繼續蜂擁流入醫藥板塊。香江則跑出了炒股海王英特龍（8329），單日升18%；國藥（1099）創新高後回吐幅度亦有個譜，因為市盈率雖然係貴，比起內地創業板嘅80倍PE（未計首日升幅），仍有唔細炒作空間。
無獨有偶，國資委要求華潤集團進行主業調整，增加醫藥業務。集團旗下的醫藥業務其實早於前年已開始重組，直接或間接控有幾家內地醫藥巨企，包括雙鶴藥業、萬東醫療、三九醫藥等，加埋資產260億元人民幣，相信又係執靚靚包好花紙後再分拆上市。
華潤集團仲有單刁。呢個好媽媽，可能見市況風高浪急，宣佈華潤創業（291）重組計劃，股份暫停買賣，順利避過大跌市。繼早前將燃氣業務注入打救華潤燃氣（1193），仲有年中私有化失敗的華潤微電子（597），宣佈供股後阿媽照供，擺明要泵水搞靚間公司，其實當年阿媽將華潤水泥私有化一樣用心良苦，就係一心想救番阿仔，等佢可以喺較少市場干預關連交易下休養生息，等到肥肥白白至出番嚟見江東父老。
華創獲筍價注超市
呢次再賣大包，左手收番華創唔係咁賺錢嘅碼頭同紡織業務，右手則以折讓價送出75間大型超市「家世界」。交易作價亦相當筍，呢批超市再搭間啤酒廠估值49.37億元，華創以碼頭及紡織「豬頭骨」交換，值47.84億元，即係着數咗1.53億元，母公司只係象徵式收番3000萬元茶錢就算數。
心煩氣躁又多疑嘅香港人會質疑點有咁大隻蛤乸隨街跳。管理層話其實早自07年已有意提出收購，只係當年家世界蝕近5億元，擔心影響公司盤數，所以交由阿媽出手，執靚靚先畀番阿仔，結果今年上半年火速扭虧，賺4370萬元，資產值增至超過47億元，大大增加華創銷售網點之餘，亦有助提升資本實力，實為一石二鳥。
阿媽益阿仔唔係新鮮事，中海油（883）、中石化（386）、中移動（941）都有類似「贏阿仔、輸阿媽」嘅前科，放鬆啲啦香港人！
胡孟青