股神畢菲特憑佢對市場嘅洞悉力，再以技術擊倒一眾新晉金融才子同埋全球央行行長，榮膺「金融界最具智慧投資大師」。
贏在夠坦白肯認錯
早排《彭博資訊》向全球超過1400個投資者做咗個調查，有近23%人投票畀股神，選佢做投資界智慧巨人，債券大王兼PIMCO行政總裁格羅斯，得票率係16%，屈居第二，輸股神成條街，國際大鱷索羅斯就有10%人支持，新末日博士魯賓尼同聯儲局主席伯南克就分別有9%同埋8%擁躉。
對於股神榮登榜首，專家分析話，畢菲特致勝關鍵在於佢夠坦白同埋願意承認錯誤，就好似佢承認自己因為唔理解科技業所以唔投資科技股，同埋曾經喺股東大會自責買入康菲石油係「majormistake」（重大錯誤），「試問當今世上有邊個人肯承認錯誤之餘，仲敢同人講自己有嘢唔識？」
順帶一提，名單中嘅10個智者大部份都幾合理，但華華就有個疑問，聯儲局前主席格林斯潘得票率都有3%，反而07年賺錢之神約翰保爾森，同埋商品大王羅杰斯就連提名都無，怪唔之得有13%受訪者唔願揀啦。
李華華
最具智慧金融界人士
‧股神畢菲特 得票率：23%
‧債券大王格羅斯 得票率：16%
‧國際大炒家索羅斯 得票率：10%
‧新末日博士魯賓尼 得票率：9%
‧聯儲局主席伯南克 得票率：8%
‧原裝末日博士麥嘉華 得票率：7%
‧聯儲局前主席格林斯潘 得票率：3%
‧諾貝爾經濟學獎得主斯蒂格利茨 得票率：3%
‧歐洲央行行長特里謝 得票率：3%
註：餘下13%為其他人選，5%無意見