去年立法會選舉慘敗後，田少退下自由黨領導要職，雖然變成普通黨員，不過佢地位超然，言行仍十分有影響力，噚日接受港台節目《議事論事》訪問時，對自由黨前景顯得雄心壯志，更加寄望自由黨下屆立法會選舉可以搶佔功能組別三席。
田少咁心雄令人譁然，唔通佢想反攻三位前黨員林健鋒、梁君彥以及梁劉柔芬嘅現有議席，即係商界（一）、工業界（一）同紡織界，要一雪前恥？田少強調絕對唔係玩針對，透露心水嘅三個功能組別議席分別係旅遊界、商界（二）同埋紡織界，事關自由黨在呢三個界別人脈深厚，有實力同其他候選人決一高下。
佢特別提到自由黨同紡織界淵源深，佢自己、唐唐、方剛同已故張鑑泉都係紡織界出身，自由黨喺業界有好多支持者，況且現任嘅梁劉柔芬都做咗好耐咁話。
雖則田少冇講明梁太係唔係要光榮引退、退位讓賢，家先禮後兵，紡織界恐怕都要變天咯。