維園年宵乾貨檔噚日公開競投，支聯會十年如一喺年宵擺檔，主席司徒華親自出馬舉手，以40,300元投咗兩個檔位，成功投得檔位後竟然全場鼓掌，好似大富豪投到地王咁威水。華叔舊年花18,400元投到兩檔，今年貴咗成倍有多，但係未破06年紀錄，當年叫價到49,200元先扑槌。
支聯會年宵檔位最大吸引力係華叔坐鎮寫揮春，仲有賣民運產品，華叔話有信心食住六四事件20周年條水，估計民運書籍會暢銷。亞視前主播馮兆寧噚日都有舉手，佢轉投由幾個自由黨退黨議員組成嘅「經濟動L」做職員，用18,600元投得一檔位，到時賣乜，要賣個關子。