今期歐洲早飛區由我畢傑推介，當然揀番地盤西甲波，要禮拜日華倫西亞作客擊敗馬拉加，1.8倍單W夠晒分頭，「客勝」都好有信心。
睇番西班牙《馬卡報》周四報道，華倫主力有傳再被挖角，「孖寶」韋拿與大衛施華受到曼聯垂青，願意出價5,520萬歐元一併收購，聽講交易好近磅；至於桑馬達又被利物浦睇中，轉會費1,800萬歐元。華倫主力被挖角嘅消息，呢一年成日都傳出，但隊波只要「夫添」出擊，基本上好少令捧場客失望，證明韋拿等心理從未受影響。
周三西盃第4圈首回合，華倫收起晒韋拿、大衛施華、桑馬達同柏保路靴南迪斯全部主力，只留番傷癒冇耐嘅巴拉查、馬杜路同祖亞昆博吓；結果後者仲一箭定江山，作客贏埋艾高恩奴。
嚟緊周日對馬拉加，上述幾位球星唔使問亞貴肯定復任正選，食住個勢贏波應冇難度。馬拉加近7場西甲輸足6場，上季嘅攻擊鐵三角崩咗一邊，明顯冇晒威力，1.8倍客W值得早買。
放心捧曼城玩阿「伯」
過關腳我揀咗英超場次，要曼城作客贏楊家誠嘅伯明翰，1.7倍W又係可放心捧。伯明翰上場2:1贏新特蘭，畢傑睇足全場，除發現主隊首個入球明顯越位外，全場踢起上嚟其實表現麻麻。「黑貓」嗰場波突然踢得比以往差，包括費沙甘保失絕佳良機、戴倫賓特門前僅僅射斜等等，先俾伯明翰贏到。
曼城周中打完英聯盃16強，結果收起艾迪巴約都贏夠斯肯索普5:1，最高興當然係前鋒辛達告魯斯都有波入。下周日去到伯明翰，預料曼城形勢會一面倒。文：畢傑
全日重心
主客和過關：星期日36曼城勝（1.7）x星期日55華倫西亞勝（1.8）2x1
讓球主客和過關：星期日36伯明翰和[+1]（3.5）x星期日55華倫西亞勝[-1]（3.25）2x3