人力資源管理顧問公司HayGroup同《亞洲銀行家》雜誌噚日公佈亞太區最高收入50個銀行總裁排行榜，頭4名全部由澳洲錢莊包辦，最高人工係香港人都應該幾熟識嘅滙豐亞太區前行政總裁邵銘高（MichaelSmith），佢家係ANZ澳紐銀行執行總裁，年薪高達898萬美金，即係大約7000萬港銀。
東亞寶哥哥排第五
我哋香港就有東亞銀行（023）主席李國寶，以年薪3350萬排名第五，都算「為港爭光」！至於大陸錢莊雖然係最賺錢嘅錢莊，但佢哋好多辦事人嘅人工都好節制。當中最高人工係深圳發展銀行董事長兼執行長FrankNewman，收233萬美金排第13名。