重陽登高拜山之後，路經沙田馬會，於是走入去食早餐。西式早餐不外乎咖啡或茶，果汁或香腸煎雙蛋，多士之類，中式早餐就有粥與炒麪。見到煎雙蛋，就想起一位餅家老闆在中秋節前對左丁山講：「你鍾意食月餅就食啦，唔使理嗰啲甚麼營養學家話月餅會太多膽固醇，一年食一次啫噃，你可以問吓自己，好多人時時在酒店食早餐就要食煎雙蛋加腸仔或煙肉啦，試問有冇驚過膽固醇呀？」餅店老闆所言未嘗無理，但諗諗吓，都係食碗瘦肉粥與一碟西瓜就算。
後來睇到《國際先驅論壇報》一段有趣報導，瑞典有餐廳為咗環保，為咗氣候轉變，已在餐單上每一款食物之後，列明碳排放量，環保人士會點碳排放量最少嘅食物。原來瑞典人喜吃白米（飯），但白米之「碳足印」（carbonfootprint）比大麥會高出幾倍，於是不少人放棄食飯。一位食客正在食漢堡包，畀記者捉住訪問，居然道歉，猛話食紅肉係唔啱。
唉吔，食餐食成咁，不知有何樂趣。美國有餐單列明每款食物所含之卡路里，勸人避免癡肥，瑞典十分前衞，現在推行少吃碳排放甚高之食物，想落瑞典餐一定十分冇味道。
左丁山幾懷疑一啲排放量計算嘅準確性，譬如一碗白飯與一碗拉麪之「碳足印」究竟從何說起，如何比較，內裏有甚麼假設？我哋如果吃美國牛肉，碳足印一定高過我哋吃本地黃牛（假如仲有嘅話），因為美國牛肉須要好多個小時嘅運輸時間先至嚟到香港，貨車與貨輪嘅碳排放一定高。如此講法，我哋全部吃本地生產嘅食物，應該最環保。但如此一來，世界食品貿易死晒都得啦，有幾多人會失業無飯食？
食早餐要諗咁多嘢，實在麻煩。不可不知，早餐食料會越來越貴，大凡茶葉、咖啡、可可、原糖嘅期貨價格今年不斷上升，早餐遲早要加價。乜唔係啫，糖價今年升咗86%，二十八年新高；茶葉升咗70%，創歷史新高；橙汁升60%，十五個月新高；可可升28%，三十年新高；Arabica咖啡升30%，近十一年新高。如要對沖早餐，有膽者不妨揸番一兩手期貨商品好倉，於是一路食一路笑到咭咭聲（又或者喊到食唔落！）